مهماي ، وقلماي...والحديث عن " الحاج ترامادول "؟
============================
مهماي...
°°°°°°°°
كيفك يا بو صاحب اليوم ، تنقي فى سنونك امال متغدي و واكل لحم جمل شارف؟
قلماي...
°°°°°°°°
الحمدلله اموري تمام...فعلا اليوم متغدي غداء سمح عند " الحاج".. بمناسبة عرس ولده...زحمة قصاعي... وزحمة معازيم ...كان رايح منك حد تلقاه غادي اليوم ؟
مهماي..
°°°°°°°°
منو " الحاج " انشالله انحجوا؟
قلماي...الحاج --"اللافي"--...امال ما عزمك ؟ ..والا عزمك وما جيت؟
مهماي...
°°°°°°°°°
آآآهههه..." الحاج ترامادول "...عزمني وما مشيت...؟
توه بالله عليك انا عارفه شن يخدم...وفلوسه ...منين ؟وتبيني نمشي ناكل عنده...والله ما انديرها؟
قلماي...
°°°°°°°°
فلوسة بينه وبين ربه...انت مانك رقيب عليه ...والعزومه هذا عرس مبارك ؟
مهماي...
°°°°°°°°°
اللي مشى صحتين..كالا ---انا ماني قاص له خطوه في اي مناسبة ...ما دام يتاجر فى الممنوع--ويسسم فى صغارنا وفى البلاد كلها ؟
