كلام الحق وجاع ...
كلام مواطن ليبى زعلان ..؟منقول..
---------------------------
كلامي اليوم قد لايعجب الكثيرين ولكن شئتم أم ابيتم هذا هو الواقع وهذا الذي يجب أن يقال ٠
كل الصفحات من أمس إلى اليوم شادتها جيش اللاكرامة ٠٠كلاب حفتر ٠٠٠٠مليشيات المهزوم ٠
يااخوانا مش هاذيم أولادكم من كل مناطق ليبيا! وإلا جايين من كوكب آخر ٠الغريب في الأمر منشور ايقول حفتر يستعرض بقوات مصرية واماراتية ٠شنو هالكلام الفارغ٠٠لا ياسيد هاذيم ليبيين أبا عن جد وماهمش جردان وفيه اللي منهم من اللواء 32 وكتيبة امحمد اللي قاتلوا المقملين والناتو لآخر لحظة ٠وماباعوا لاخانوا معمر حتى استشهاده ٠
لكن تو الوطن ضاع ومازال بيضيع ٠معمر ماخانوه الجيش
لكن خانه المقربون والمستفيدين من نظامه وماحد يقدر ينكر هالشي ٠القوات المسلحة قامت بالواجب اعيد واكرر ٠
مشي معمر وهو في دار الحق ٠لكن الوطن باقي ٠٠ضروري من التنازلات للمحافظة عليه اوعلى ماتبقى منه
تو واجدين ايقولوا حني بكرامتنا ٠واللي فاقد كرامته يمشي يتبع حفتر ٠ لا والله الليبيين كلكم ماعاد عندكم كرامة من 2011 فقدتوها سوى فالداخل وإلا فالخارج ٠
أنت يلي بكرامتك وين كرامتك يوم اينزلوك من سيارتك قدام صغارك ويفتشوا محارمك وعينك تشبح وفمك ماتقدر تفتحه
وين كرامتك وأنت واقف كيف الزايلة فطابور المصرف بيش يلوحولك 100 دينار مايصرفنك يوم واحد ٠
وين كرامتك يوم ايلبزك مليشياوي علي وجهك ومافيه من ايردلك اعتبارك ٠ ادك رأسك وتمشي في كتوفك ٠
وين الكرامة اللي تفاخروا بيها وبناتكم هتايا فدول العالم ٠
وتقولوا عندنا كرامة ٠٠والله ماعندكم كرامة لاقيمة أصلا ٠
حفتر خاين٠٠٠ حفتر عميل ٠٠٠حفتر مهزوم ٠ مش هذا موضوعنا
ضم الجيش ولمه ونظمه مش أي حد ايديره على الرغم من إختلاف آرائهم السياسية ٠وآلله مجهود جبار يشهد له٠
كم عام مضى وكمشة المكاذب يكذبوا وينظروا علينا نقصد ( نحن البسطاء ) الزحف قادم ٠٠بنحرروا ٠٠٠ بنطهروا
زياط في امية طلعوا مخانب متاعين افلوس بس٠
المشكلة تو يفضحوا فبعضهم ٠الشبعانيين المستفيدين هاربين برا وزايطين ٠ وغدوة ايصير ما ايصير يطلعوا مهجرين ومناضلين ( كونها تهجيرة الحبايب )ويتعوضوا عالغربة ٠وأنتم الغلابة كولوا البلح بلا امية٠
هذا غير اللي هبكوا بعد النكبة طايحيلها محلات وسيارات وحسابات برا وداخل ومتبعين سياسة ٠٠ كان طاح بيت بوك سل منه عمود ٠
إي مبادي واي وطنية تفصلوا فيها ياجبناء ياخونة يامخانب
مع احترامي للقلة القليلة الشريفة العفيفة النظيفة اللي ماعندهم جهد حتى كيف ياخذوا مرتبهم كاش ٠
اليوم بنحاول انكون صريح أكثر من اللازم وعارف طول بننحط في قائمة الجردان و صفتي ونعتي ٠بالرغم من أنهم يعرفوني مافيوم أيدت النكبة والله شاهد لابفعل لابقول
ويعرفوا أني تكلمت وقت كانت الافام مقلفطة ولاهربت كيف واجدين برا البلاد ٠فبراير كنت ضدها من اول يوم إلى أن يضمني القبر ٠ولكن ارى وطني يؤخذ مني وكل خطوة للملمة شتاته يخرج المتشدقون ويبذلون الغالي والنفيس لاجهاضها ٠فلا والله ٠
اليوم نرى الكثيرون ينادون بعودة الجماهيرية وسلطة الشعب والديمقراطية وكثير من الشعارات الفضفاضة ٠وكله كذب ونفاق ٠
وين الشعب اللي كان حاكم نفسه بنفسه ويمارس فالسلطة ٠
وامتى عشتوا الديمقراطية وامتى كان ليكم القرار٠ طبعا الكلام للغلابة٠ مش للتماسيح ٠فكرة نعم اوجدها الزعيم لكن تطبيقها مستحيل لأن ثقافة الشعب لاتسمح بذلك ٠والدليل ماصاير في البلاد الان ٠فكرة لم تطبق بل كنا في الوساطة والمحسوبية ٠والمتملقون واللقاقة والزنقاحة هم المستفيدون
عن أي نظام جماهيري تتحدثون ٠يامنافقين
المخانب خنبوا رزق الليبيين وطايحيلها برا ٠وشادينها تحركوا ٠٠ نوضوا ٠٠بيش بنوضوا أنتم خليتولنا عليش نسندوا ٠كليتوه خضر ويابس ياحرايمية
النظام الجماهيري به الكثير والكثير من الأخطاء وكلكم بلا نفاق عارفينها وعشتوها ٠نعم كان الأمن والأمان شي طبيعي
لأن فيه دولة ٠وفيه اجهزة امنية تشتغل ٠٠وقوات مسلحة وهي التي ندعمها الان وبكل قوة ٠٠
بعدالنكبة في الشرق كم قطعوا راس عسكري٠٠ بالك قالوا هذا فبرايري وإلا سبتمبري ٠٠ عبدالفتاح يونس كان معاهم أول ماسيطروا ذبوله راسه ٠لأنه عسكري مايهمش رايه السياسي بالتالي كان هدفهم تدمير الجيش وبسط الفوضى وهذا ماكان مخطط له ٠
أطلت الكتابة لكن سااختم وأقول إن القوات المسلحة هي طوق النجاة لكل الليبيين بمختلف أطيافهم واتجاهاتهم السياسية فلن تكون ليبيا بدون القوات المسلحة٠
والتاليات ليهن الله ٠
