قراءة متأنية في بيان الرباعية ...

منقول...للاطلاع وامكانية المشاركة فى الهدرزة من خلال التعليقات ؟

.
سمعتوا باللي قالوا ان ترامب بعث رسالة لعقيلة وان ترامب اتصل بحفتر وقاله سلّم المواني 
وسمعتوا باللي قالوا ان حفتر خذل اهل برقة والمفروض ما يسلمش الموانئ لطرابلس 
القصة مش هنا 
القصة هي ان ابواق الاخوان والمليشيات والمطلينين اصيبت بالإحباط الشديد
ليش تقول هكي؟
هما يبوا القيادة العامة ما تسلمش الموانئ باش المجتمع الدولي يدير قرار ضدها ويتحركوا ضد المشير ويضربوا الجيش في الموانئ ويقولوا للسراج ارسل قوة لحماية الموانئ وطبعا حيرسل مليشيات مصراتة وتحت غطاء جوي من ايطاليا والناتو وتسمعوا بعدها من ابواق المطلينين ان حفتر طلع غبي في العملية وخسر كل شئ 
باهي هِيا هِيا زي سلم زي ما سلمش ...
شوف ... لو ان القيادة العامة سلمت الموانئ لطرابلس بعد طرد الجضران في 21 يونيو ما فيش اي استفادة وبالعكس يمكن الجضران يرجع يهاجم مرة ثانية الموانئ وترجع المشاكل من جديد
لكن القيادة سلمت المواني لحكومة الثني مع انها تعرف انها لن تصدر برميل واحد، يعني تصدير النفط يوك يا بشير ...
والقيادة قالت تبوا تصدروا النفط هاذي شروطنا واللي اهمها :
1- تشكيل لجنة تحقيق في قيام مصرف ليبيا المركزي بتمويل المليشيات وكيفية ادارة وتوزيع عوائد النفط وميزانية الجيش 
2- استمرار الجيش في حماية المنشآت النفطية
3- احترام قرارات مجلس النواب والتي تخص مصرف ليبيا المركزي
4- الإلتزام بإتفاق باريس وراء الإنتخابات في نهاية العام

امس الخميس صدر بيان من الرباعية ( امريكا وبريطانيا وفرنسا وايطاليا) ثلاثة منهم اعضاء دائمون ڤي مجلس الأمن وقالوا:
- اول حاجة نثمن مساهمة الجيش في استعادة الاستقرار في قطاع النفط ..
وهذي تعني أنسوا ان حد ثاني يقدر يخش للهلال النفطي وان الجيش وبس اللي يحمي النفط. وبيان الرباعية يؤكذ هذا الكلام حيث انه لم يطلب انسحاب القوات غير الخاضعة لحكومة الوفاق من الموانئ. 
وهذي تعني تنفيذ للشرط الثاني من شروط الجيش لإعادة تصدير النفط

- ثاني حاجة قالوا حان الوقت للتحرك لتحسين الشفافية المالية والتوزيع العادل لموارد البلاد وتسوية الاختلافات بشأن مصرف ليبيا المركزي 
وهاذي تعني ضمنيا تنفيذ الشرط الاول للجيش في التحقيق في كيفية توزيع مصرف ليبيا لعوائد النفط والاتفاق على محافظ جديد لمصرف ليبيا المركزي ... الرباعية ما تبيش تطلع انها هي اللي تصدر قرارات تعيين محافظ جديد لمصرف ليبيا المركزي وقد لا يكون تعيين محافظ جديد فورا حفظا لماء الوجه وحتى لا تبدو الرباعية انها اذعنت بسهولة للقيادة العامة

- ثالث حاجة قالوا انهم يتضامنون مع اجراء انتخابات في اقرب وقت ممكن 
وهذي تعني الموافقة على الشرط الرابع للجيش

واخر شي قالته الرباعية انهم سيحاسبون كل من يقوض الامن والسلام والاستقرار في ليبيا 
وتعني ان كل من يعرقل ما تم الاتفاق عليه في هذا البيان سيلاحق بكل الامكانيات المتاحة

بإختصار لو تراجع بيان الرباعية سطر سطر كلمة كلمة تلقاه في الحقيقة هو رد على شروط الجيش وقبولها ...

يعني قصدك ان امريكا وبريطانيا وايطاليا وفرنسا خافوا من المشير وتوا بينفذوا شروطه تي قول كلام ثاني يا را ...؟
ايه عندك الحق ...
لأنك مش عارف ان البواخر الروسية محملة بالثقيل من #مخازن_الجيش_الروسي بدت لول لول توصل لميناء لأسكندرية وكلها ماشية للجيش الليبي ونزيد نقولك صحيفة الواشنطن تايمز قالت امس في مقال عن ليبيا ان كل اجهزة الاستخبارات الامريكية تراقب عن كثب التحركات الروسية بإتجاه ليبيا ...
تبي تقول ترامب اتصل بالمشير وقاله افتح النفط والمشير خاف وفتح الموانئ قول على راحتك 
لكن ما تنساش ان ايطاليا وامريكا عارفين ان المشير عنده اوراق ثانية في اللعبة السياسية في ليبيا وداسها وحيطلعها في الوقت المناسب 
وراهو المشير مش عابي لا على الامارات ولا على فرنسا وكان ايطاليا بتصكر راسها وبتلعب برزق الليبيين وبتعتبر ليبيا الشاطئ الرابع لروما وكل مرة تفتح في قواعد عسكرية في ليبيا وتقول هذا مستشفى ميداني في مصراتة وهذي ورشة صيانة سفن في ابوستة وهذي مركز أمني للتصدي للهجرة غير الشرعية في غات ... يفتح الله هذا معادش يمشي 
وما تنسوش شني قال المسماري امس قال نحن جاهزون #للمهمة_الجديدة وفي انتظار تعليمات القيادة العامة 
وضحت الصورة وإلا مازال
اطّمنوا وانتظروا المفاجآت